ముళ్లపూడి - పెళ్లిపుస్తకం

నిజమైన ప్రేమ కొడిగట్టని దీపం. దానిపై అనుమానపు నీడలు నిలువలేవు. ఈ విషయాన్ని ఆలస్యంగా గ్రహిస్తుంది భామ. బాసుగారి అమ్మాయితో భర్త కృష్ణమూర్తి చనువును భరించలేకపోతుంది. నువ్వనుకుంటుంది కరెక్ట్ కాదని కృష్ణమూర్తి ఎంత చెప్పినా వినదు. ‘‘నేను మీకు అక్కర్లేదు అనుకునప్పుడు, మీరూ నాకు అక్కర్లేదు’’ అని తెగేసి చెబుతుంది. ‘‘భర్త తిట్టినా కొట్టినా మీరే దైవం అనే పతివ్రతను కాను. నాలాంటి మరో బుద్ధితక్కువ పిల్ల మీలాంటి వాళ్ల వల్లో పడి అన్యాయమైపోతుంటే నాకేంటి అని ఊరుకునే ఆడదాన్ని కూడా కాదు. రేపే మీ బండారాన్ని బాసుగారి ముందు బద్దలు కొట్టేస్తా’’ అని చెప్పి సీరియస్‌గా వెళ్లిపోతుంది.

భార్య తొందరపాటు తనాన్నీ చూసి నవ్వాలో ఏడ్వాలో అర్థంకాదు కృష్ణమూర్తికి. తెల్లారితే బాసు షష్టి పూర్తి. భార్య ముందు చేతులు జోడించి నిలబడతాడు. ‘‘నేను నీచమైన డబ్బుకోసం గొంతులు కోసే కిరాతకుడ్నని తేల్చేశారు. డబ్బెంత నీచమైందైనా... ఇప్పుడది నాకవసరం. ఇంకో పదిరోజుల్లో మా చెల్లెలు గుండె ఆపరేషన్ ఉంది. ఈ రోజు పనివాళ్లకు బాస్ బోనస్ ఇస్తున్నారు. మీరివాళే నా బండారం బద్దలు కొట్టి... బాసుగారి అమ్మాయిని నా కుట్ర నుంచి కాపాడతానన్నారు. అది ఒక్క రోజు ఆపండి. వెయ్యి అబద్దాలాడి ఒక పెళ్లి చేయమన్నారు. ఒక్క నిజాన్ని ఒక్క పూట ఆపి నా చెల్లికి ప్రాణదానం చెయ్యండి’’ అని భార్యను బ్రతిమాలతాడు. భామ ఆలోచించి అప్పటికి ఆగుతుంది.

కాపురానికి పునాది నమ్మకమని షష్టిపూర్తిలో బాసుగారి భార్య చెప్పే మాటలు భామను ఆలోచింపజేస్తాయి. అప్పుడే బాసుగారి కూతురు మరొకర్ని ప్రేమిస్తుందన్న నిజాన్ని కూడా తెలుసుకుంటుంది. భర్త విషయంలో తాను చేసిన తప్పుకు కుమిలిపోతుంది. ఇక ఒక్క క్షణం కూడా భర్తకు దూరంగా ఉండలేకపోతుంది. తనతో మాట్లాడాలని ఎంత ప్రయత్నించినా ఆమెకు ఆ అవకాశం ఇవ్వడు కృష్ణమూర్తి. పుణ్యదంపతుల తాంబూలం అందుకునే ఘడియ రానేవస్తుంది.

ఆపద్ధర్మంగా తెచ్చుకున్న అద్దెమొగుడుతో అగ్నిహోత్రం ముందు నిలబడుతుంది భామ. అగ్నిదేవుడు భగ్గుమంటాడు. ఆ పాపాన్ని, ఈ భారాన్ని భరించలేని భామ ఆర్తనాదంచేసి కుప్పకూలిపోతుంది. సొమ్మసిల్లుతున్న భార్యను చేతుల్లోకి తీసుకుంటాడు కృష్ణమూర్తి. గట్టిగా గుండెలకు హత్తుకొని ఓదారుస్తాడు. ‘‘నిజాన్ని నీకు నువ్వుగా తెలుసుకోవాలని నిన్ను బాధపెట్టాను. ఈ బాధ మంచిది. అగ్నిగుండం ముందు నీ అనుమానం ఆవిరైపోయింది. నీ కన్నీరు నీ గుండెను కడిగి శుభ్రం చేసింది. ఇక కీడు క్రీనీడ కూడా మనమీద పడదు. ఇక నుంచి మన పెళ్లిపుస్తకంలో అన్నీ మంచి పేజీలే’’ అని భామ కన్నీళ్లను తుడుస్తాడు కృష్ణమూర్తి.

పెళ్లంటే... పాలల్లో పాలులా కలిసిపోవడం. పంచదారలా కరిగిపోవడం. పెళ్లంటే నమ్మకం. పెళ్లంటే భరోసా. పెళ్లంటే విడదీయలేని బంధం. దాన్ని గొప్పతనాన్ని గొప్పగా ఆవిష్కరించింది ‘పెళ్లిపుస్తకం’. ఇందులో ప్రతి పేజీ అందమైనదే. తెలుగుతనానికి నిలువెత్తు నిదర్శనం ఈ సినిమా. ముళ్లపూడి రచన, బాపు దర్శకత్వం ఈ చిత్రాన్ని క్లాసిక్‌ని చేశాయి. ముళ్లపూడి భౌతికంగా మనకు దూరమమైనా... చిత్రసీమపై ఆయన చల్లిన విలువలు ఎప్పటికీ పరిమళాలను వెదజల్లుతూనే ఉంటాయి.
- బుర్రా నరసింహ


ముళ్లపూడి వెంకటరమణ స్మృత్యర్థం * పాట
 
పల్లవి :
మేడమీద మేడగట్టి కోట్లు
కూడబెట్టినట్టి కామందు
హలో హలో కమాన్ కమౌట్ రాముందు
అందుకుంటే జుట్టుపట్టి
అందకుంటే కాళ్లుకట్టు కామందు
హలో హలో కమాన్ కమౌట్ రాముందు
దిగి రాముందు ॥
బుచ్చబ్బాయ్ పని కావాలోయ్ (3)
చరణం : 1
ఆడపిల్ల మాటమీద ఉద్యోగాలు
ఊడగొట్టు ఆకతాయి కామందు
మీసకట్టు తీసివేసి కాసపోసికోకచుట్టి
గాజులేసికొమ్మందు ॥
డొక్కచీరివేస్తాము డోలుకట్టి తెస్తాము
డోలు కొట్టి గోల పెట్టి రచ్చకెక్కుతాం
॥
బుచ్చబ్బాయ్ పని కావాలోయ్ (3)
చరణం : 2
రాత్రికి నేనొక రాక్షసినై నీ కలలో పీడిస్తా (2)
రేపటి వేళకు నీ పని మీదని దారికి రాకుంటే
మాపటి వేళకు మీ పని నేపడతానోయ్
బుచ్చబ్బాయ్
మిన్ను విరిగి మీదపడ్డ మన్ను మిన్ను ఏకమైనా
నిన్ను గెలిచే వరకు మేము
ఆడితీరుతామ్ పోరాడితీరుతామ్
బుచ్చబ్బాయ్ పని కావాలోయ్ (3)
॥
బుచ్చబ్బాయ్ పని కావాలోయ్ (3)
చిత్రం : ప్రేమించిచూడు (1965)
రచన : ముళ్లపూడి వెంకటరమణ
సంగీతం : మాస్టర్ వేణు
గానం : పి.బి.శ్రీనివాస్, బృందం
                                            *    *    *
ముళ్లపూడి వెంకటరమణ స్మృత్యర్థం * పాట 2

పల్లవి :
తొలికోడి కూసేను తెలవార వచ్చేను
మరుకేళి చాలించి నిదురపో
॥
నాదు మొరకాస్త ఆలించి నిదురపో
అందగాడా నిదురపో చందురూడా నిదురపో అందగాడా నిదురపో చందురూడా నిదురపో
॥
చరణం : 1
ఇల్లంతా కడగాలి కళ్లాపి చల్లాలి
ముగ్గులు పెట్టాలి గోపాలుడా
కాఫీలు కలపాలి టిఫినీలు చెయ్యాలి
చెంగు విడి చిపెట్టు గోపాలుడా
చెంగు విడి చిపెట్టి సెలవిచ్చి పంపితే
మాపటేళకు మళ్లీ వస్తాను
తెల్లచీర కట్టి మల్లెపూలు పెట్టి
గుమ్ము గుమ్మను కౌగిలిస్తాను
గుండెలో వలపంతా గుమ్మరిస్తాను
చెంగు వదలర సామి గోపాలుడా
సరుసుడ నా సామి గోపాలుడా
॥
చరణం : 2
సుప్పనాతి సూరీడొచ్చెను
వెన్నెలంతా ఎరబ్రారెను
మల్లెలన్నీ నల్లబోయెను కలువకన్నియ
కందిపోయెను కమిలిపోయెను కానుకో
కంటినిండా నిదురాకోసం
కాచి ఉన్నది చూసుకో రసికరాజ నిదురపో
ధిక్తన ధిక్తన ధిక్తన ధిన ధిక్తన ధిక్తన ధిక్తన
మూడు జాములు తిరగాలేదు
నాలుగోది పొడవాలేదు
తొందరెందుకు సూరీడా ఎందుకొస్తివి సూరీడా
నిన్నెవరు పిలిచారు సూరీడా
నీకిక్కడేమి పని సూరీడా
నీకెప్పుడేమి పని సూరీడా...
పోరా పోరా సూరీడా రారా సూరీడా
పోరా పోరా...
చిత్రం : రాధాగోపాళం (2005)
రచన : ముళ్లపూడి వెంకటరమణ
సంగీతం : మణిశర్మ
గానం : మురళీధర్, చిత్ర

 

                       *                      *                          *